O débi lété : « Le Chik lé zist kom inn grip’ »,  in pé pli tar « …kom inn fort’ grip », pwi « na pwin person’ y mèr du Chik », answit « na d’moun y mèr, solman lé pa lié au Chik » pwi « sak y mèr lété déjà malad’ » é zordi « sak y mèr y pé èt sin ou déjà atin dinn malady. Doplis, la maladi la évolié. Na pwin inn’ simptom’ lé idantik. Y dépan du boug k’lé atin. Le Chikungunya y pé koz domaz dan tou lorganism : sistinm dijestif, kardiovaskilèr, respiratwar, épatik… »

Alor, kisa té y ginll pou linstan ? Ti bébèt’ la la pa fin’ fè kozé dèl. El y jou pa dan l’mansonz èl, mé plito dan la sirpriz, si y pé apèl sa konmsa.

Zot y vwa kosa y ariv ek in moustik.

Alor, ékout byin sak mi di, ek la grip aviyèr, si banna y mèt sitan d’tan pou réajir, la popilasyon rényonèz y s’ra réyé de lil an dé tan trwa mouvman…Protèj azot byin !!!
Terla, an métropol, na inn ka ofisyèl (pou kombyin oficié ???). La grip lé pir k'le Chikungunya. Pou trap aèl la pa bézwin èt piké. Band frontièr y ekzist pa.

Nawar la swit....

Ni artrouv' ;-)

Nou sa esèy gard nout sérénité, solman lé dir ek laktialité la....

Kosa y lé le rapor antre le Chik é le Klems ?

Alé, inn ti minit dé réfleksyon..... Trouvé ? pa trouvé ? Nou sa rété la le sispins' angwasan. Bin wi, larzan.

Konm mwin la di dan zartik présédan, in an pou balans nimport' kwé su d'moun an vizan band' moustik (é lé pa fini, lé sir...) , é yèr nou té y apran in siper zafèr.

Le Klems, k'la fé in vwayaz gadiamb', y sa rantré la kaz !!!! Alor la, si zot y permé amwin, .

Oté, banna y di, band fransé y jèr mal son larzan. Na d'ménaz lé andété, banna y vwa pli gro k'zot port'moné. Mé nad'moun y armontr' ankor plis lekzamp : ankor inn fwa, mi apèl sir la pli ot' mars du podium Léta. Wiiiiiii. Ali minm le gajnan di zour, pou sanzé. Misa pa dir plis, toulmoun la antandi kombyin y kout zafèrla. Mi lès azot dan zot réfleksyon.

Oté, zot y koné la séri lé 4400 ? Alor, pans in pé dan out koko. Kisa la byin pi anvoy anou in moustik de s'te ras' la ? Si ou lé an métropol, agard lo vandrédi swar, y sa don' aou inn' débi d'répons.

Sa lé pou mon tit kouzin' Sofi k'la don' anmwin lidé

Ni artrouv'

Kosa y lé la Rényon. In titil ki gainll minm pa romarké si zot y agard inn kart. Pourtan, titil la y mérit in ti pé latansyon. Son longèr y fé 150 km é son larzèr 50 km. El lé sitié dan loséan Indyin a 10 000 km de la Frans. La kapital de la Rényon lé Pari é son sèf-lié Sindéni. El lé kompozé dé trwé sirk, Cilaos, Salazie, Mafate. A lorizin lété la samb magmatik du Piton dé Nèj. Ek lérozion la don' sak y koné aktièlman. Si zot y  vyin la Rényon, vyin pa pou son band plaj. Na dé tip dé plaj.

1- Sable blan klé dorijin koralyinn : Boukan Kanot', Ros Nwar a Sin Jil, la Salin', Sinlé, Sinpièr, Granbwa.

2- Sable nwar dorijin volkanik : bé de Sinpol, Létansalé

Zot y trouv aèl solman dan le litoral sou le van (a lwest), koté la Rényon klé mwin sijé o zalizé (A lopozé na la kot o van, a l'est).

Zot y pé vwar osi le Piton de la Fournèz, in dé volkan klé le plis aktif dan l'mond'.

Tout' sa la lé povréman majik. Soley y briy toultan, band popilasyon lé mélanzé, zot y antand azot a mervèy, sak domoun y devré fèr an métropol... la flor é la fon' lé paradiziak.

Enfin, lété.

Solman, kom zot y vwa aktièlman, in ti moustik y fé son manièr. Aedes Albopictus (moustik tigr')  y fé kozé de lwi. Akoz ? Akoz band zotorité la pa fé in ka lan dernié kan lu la rivé terla. Astèr domoun y tomb kom band mous' (pou in moustik, lé for oté). Band zotorité la pri sa a la léjèr, solman zordi zot y mord' zot dwa (de min é d'pié tankafèr).  Zot y dizé, lé pa grav, maladi la lé bénijn'. Solman domoun k'lété gravman malad avan y pé mourir, é ankor lé minm pa sir. Zordi lé konfirmé. In ti marmay lé mor a dizan, domoun k'lé sin y artrouv' azot ek sékèl andikapan. Bravo léta.

Agard zordi le préfé. Sa in gran bononm sa. Kosa li fé ? Pou tié tout' band moustik li gaz domoun. Mo la lé pa asé for ankor. Li répan d'zinsèktisid la nwi dan jardin, zékol.... y prévyin minm pa band diréktèr (Tampon par ékzamp). Apré, zanfan lé intoksiké : nozé, mo d'vantr', migrinn. Lékol y ferm (Plèn dé Palmist...). Mé lo boug y kontinu dan son zest.

"Y fo k'domoun y abiti azot a antand band véikil de pilvérizasyon noktirn, minm aprè la fin de lépidémi. Na okin' limit' dan la diré, y sra pou toultan." Kosa ou vé dir aprésa.  Banna y mèt zinsektisid san savwar kosa y fé pou lanvironman,  lé zonm. Astèr ou dékouv k'na domoun lé intoksiké (mi répèt amwin), zandormi y dor définitivman. Di kou, pu d'zandormi = plis de moustik, non ? Band zwazo y manj zinsekt klé touché par zinsektisid y sa mourir osi. Sa minm leksterminasyon (déz)organizé (Y rapèl amwin in boug dan listwar la guèr). Pou tié in zafèr, li ti toulmoun. O mwin lé sir, band moustik y sa krévé. Mé ri pa tro.

Zot y koné k'band zèf moustik y gainll tenir dézan san inn' gout' dolo. Mi di azot, zafèr la la pa fin' fèr kozé dèl.

Sirtou k'na d'zouty ki ekzist pou tié band moustik é inikman moustik. Solman lé tro sèr sa. Bin non. Intoksiké lo moun lé mwin sèr.

Mi arèt la sinon misa fé inn livre.

Ni artrouv'     ;-)