Ousanousava -Bègles BT59

Koman y lé zot tout' ?

Zédi swar navé, lo 7 mé a Bègles, in tit' vil ki toush Bordeaux, inn' konser du group' Ousanousava.
Solman pou komansé navé in group k'té y apèl Lo Group.
Avan rakont' aou é fé war aou sa, mi remersi lo sit http://www.reunionnaisdumonde.com/ k'lavé mèt an jé inn' tit kantité d'byié pou ginllé... é mwin la ginll inn'. Mi invit azot alé war lo sit la, lé toujour intérésan.

Alé mi komans.
Inn zourné d'travay la pasé. Lo swar té y tard amwin. A vintèrtrant' mwin lété dovan lo BT59, la sal dé konsèr.
In ti laventur la riv amwin.
Mwin la montr' mon kart lidantité pou rotir lo biyé. Lo fanm k'lété la la di, "out non y aparé pa dan mon band' list".
Ahhhh, mi montr' answit lo mèl k'mwin lavé rosi é la ti fanm y di amwin, "ou koné, nad'sit' y fé é y di nimport' kwé, osi mi don' aou in biyé eksepsionèlman, solman mi dovré pa". Mi romersi aèl, mé mi razout, "lo sit la lé tré konu a la Rényon é dan l'mond' par band' zekspatrié, lé pa in sit poubèl". El y répond', "lo sit mi anfou, ou wa, sak mi wa sék ou lé pa dan mon list". -mi mèt sa surlfèt k'navé in takon d'moun déyèr mwin é mi rotardé lantré... anfin, pa grav. Mi sava direksyon la sal....
Zist apré mwin navé kat zèn zan. Mi antand' inn' ki di, nou la ginll band' plas' ek lo sit rényoné du mond'.... é la mi antan zist apré "apèl lo direktèr".... La mi pèt à rir dan mon kèr tééééééé. Lo boug la zwé dan la pub la MAAF ???
Pandan s'tan la in ti mamzèl k'lété bèl konm.... inn flèr flanbwayan, alé !!! y di amwin, "kosa y pas' ?".
Alor mi eksplik aèl. Son band' zami la pa ginll pasé. El navé in biyé asté pli to. Kan el la vu k'mwin lavé inn', el té y domand amwin, "oté ben ou la asèt ali ou ou sa rant out kaz ???".
Mi répond', "asèt ali, non tééé, mwin la ginllé, mwin loré zamé asté. Solman ti fanm la la don' amwin".
In boug y di answit, "sak y vé rantré y ginll astèr". Osito li di sa, osito mi rant. Mi agad' in kou déyèr mwin é band' zèn la pa ginll zot biyé é mi antand lo fanm la biyètri ki di "la list sa rivé dan trwa minit".
Mi avans. In boug y toush mon sak et y domand amwin si mwin na pa d'boutèy. Mi répond' non. Li di, "sa la, sa la pa inn' boutey sa ?" Mi répond', "non, sa mon laparèy foto". Li krwa mi plézant. Mi rouv mon sak é mi montr' ali. Parlfèt li la pri lobjektif mon laparèy pou inn' boutey, hé hé.

Arivé dan la sal, mi sa dirksyon la sèn. Solman mi vwa in fanm ki travay o BT59 ki rant dan la biyètri é ki resor. Mi sa war aèl. Mi domand aèl si el nana la list an kestyon. El y di amwin non, solman y dovré pa tardé. Mi atand' di minit ankor é mi vwa aèl rodsand' é vnir terla. Astèr el nana la list. Mon non té y aparé byin, el y rèy ali. Fanm la lété tré tré simpatik. Mwin la vu, answit, k'lo bann' zèn la fin' rant' dan la sal, vin minit' apré mwin.

Domoun y ariv' sir la sèn. Zot y prézant azot. Zot group y apèl Lo Group. Bana la komans ek inn' maloya, solman in maloya elektrik. Té gayar minm. Zot la sof la sal, la mèt lanbians minm.






















































































































Lo santèr prinsipal té y sot partou, y ri, y dans'... gayar minm.



































Ousanousava la rivé par la swit.























































Andsoula, Alfred Vienne.
































































































































































































































Oté, la la rapèl amwin d'souvnir la. Zot la zoué d'séga, d'maloya. Bernard Joron, lo santèr ek son frèr François la ropri sak zot papa lavé fé dan'l'tan.






























































































Na u in popouri, in soté konm la di Bernard, pi in ot', k'lo minm la apèl in shopswi !!! Haha.
Lanbians' lété la mi di azot !!!




























































































Konm zot y vwa sir band foto, la cho la v'ni rapidman sir zot.


















































































































































































































Rapèl azot lo band' tit' la : volèr kanar, granmèr, akoz fifine, zamalyin, ousanousava, tous les enfants....

Halala, sa lété povréman dos' mi di azot. Y sar èt lévènman, pour l'instan, k'la mark amwin lo plis an démilnèf.

























































































Ni artrouv',

Moukatali